Norsk folkemusikk og -dans i stikkord

Det er vanskeleg å gje ei heilskapleg og nøyaktig avgrensing av kva som er norsk folkemusikk. Spørsmålet om kva som eigentleg er folkemusikk er noko som har vorte diskutert aktivt i og utanfor folkemusikkmiljøet lang tid, og her er meiningane svært ulike. Ein annan sak er at folkemusikken i Noreg varierer veldig ettersom kva for landsdel det er snakk om. Dette lokale særpreget er også ganske spesielt for den norske tradisjonen jamført andre europeiske folkemusikktradisjonar, der ein ikkje har så mange ulike dialektar lenger.
Her vert berre enkelte kjenneteikn for folkemusikken i Noreg generelt nemnde punktvis, og dersom du vil ha ein grundigare gjennomgang kan du lese meir i bøkene eller på websidene som vi viser til etter denne gjennomgangen.

Anonym opphavsmann
Som oftast er "komponisten" av t.d. ein slått eller ein vokaltone ukjend, men dette er ikkje nokon absolutt regel, fordi også i dag komponerar folkemusikarar slåttar og folketonar.

Munnleg overføring
Tradisjonelt har musikken vorte overførd frå generasjon til generasjon ved munnleg overføring, det vil seie direkte frå læremeister til elev utan bruk av notar. Denne læremåten, som tek utgangspunkt i gehøret, finn framleis stad både i uorganisert og organisert form, til dømes gjennom musikkskulen. I dag er det likevel vanleg at folkemusikarar er notekunnige, og at dei kan spele/syngje etter noter.